رمضان المصرى

رمضان المصري

=========

هلت ليالي شهر كريم ,هلاله في السماء ساطع وفى القلب نوره يقين ,وفرحة طفل صغير فانوسه تزينه تلاوين ,وشمعة تقيد منورة الميادين ,وجد طيب بطاقية , وجلابية بيضا , وسبحة طويلة, يدعى رب كريم ,وأب راعى أسرته يتعب ويشقى لجل ما يحلل لقمته ,وأم تربى و تغرس قيم وتزرع نبت جيل مدد للحياة والدين , وإيمان وحب كتير و قلوب عمرانة بالخير . .

 ومدفع رمضان يضرب , وأطفال هيصة حواليه  ,مع كل طلقة فرحة وقلوبهم تقول هيه  - وشمس يوم تغيب ,وعيون دمعها يفيض - وأذان في كل مكان   ,ومساجد يعمرها عباد رحمن   .

طبلية في الصالة حواليها العيلة تتجمع , وصينية خشاف وعصير وتمر منقوع من بالليل ,فتة ولحمة وشربة سخنه, وسلطة ورز وعيش- وأكلة هنية وفرحة تملى الدنيا, والحلو كنافة وقطايف ,وكبايه شاي تعدل دماغ صايمين.

وموائد رحمان مفرودة في كل مكان ,لكل عابر سبيل يلاقى لنفسه مكان ,تجمع المصريين وتوحد الأديان.

 وفزورة ومسلسل تكمل الصورة ,فستق وبندق, جوز ولوز و سودانى نضحك ونتسلى ونحل فى الألغاز.

صلاة تراويح تجمع مسلمين , ملايين مؤمنين بالله موحدين ,  بالإيمان قلوبهم عمرانه وفى الجنة طمعانين  .

وليل سماه صافية يجمع الخلان ,مابين صلاة وقيام وقراءة القرآن .و بركة في الأيام يعمرها الإيمان ,تلاتين يوم من نور وأخرهم عيد فطور ,شهر صوم وعبادات ,تزيد الحسنات , وقلوبنا تصفى وروحانيات تسموا بنفوسنا .

وعيد فطر يجمع أهل ويلملم  الأحباب ,ولبس جديد وكعك العيد وسفر وزيارات ,سمر وضحك ولعب ,تتجدد الذكريات,الحاضر وأيامه والماضي اللي فات  ,نفتكر أيام زمان أهلنا وحبيبنا, اللي عايش منهم واللي أصبح ذكريات .
 هى دى أيامنا وأعيادنا ,أحلام بسيطة وآمال مكبوتة ,فرح بالدمع والأشجان,ورمضان المصرى يومه وفرحه مالوش مثال ,صوم وعبادة وقلوب متعلقة بالقرآن,بساطة وسماحة وفطرة وشهر كله أيمان,من غير تشدد أو تعصب أو تحيز لإخوان,إسلام كل القلوب للواحد الغفار .